Rritja e kostos së jetesës vë në vështirësi restorantet në Spanjë

E përgatitur në vitet ‘60 për të tërhequr turistë, “Menyja e Ditës” në Spanjë konsiderohet prej kohësh vakti më i mirë i Madridit.

Por me inflacionin e rritur me rreth 10 për qind, ekzistenca e saj është në rrezik dhe menaxherët e restoranteve po përpiqen të normalizojnë çmimet.

Si fillim, pjata kryesore plus kafenë shkojnë rreth 12.8 euro. Më parë i njëjti çmim përfshinte edhe 2 artikuj të tjerë.

“Nga 4 artikuj kemi kaluar në 2. Opsionet janë reduktuar”, thotë Laura Rubio, kamariere restoranti, Madrid.

E njëjta situatë është edhe në restorante të tjera.

“Kam vënë re se çmimi i menysë ditore është rritur lehtshëm, por çdo gjë është rritur, apo jo?”, shprehet Sara Riballo, menaxhere marketingu.

Restorantet spanjolle shërbejnë mesatarisht 4 milionë “meny ditore” në ditë në vendin me 47 milionë banorë.

“Nuk kemi ndryshuar asgjë në parim. Po përpiqemi të menaxhojmë humbjet, por druhemi se do të na duhet të rrisim çmimin e menysë ditore pasi ndodhemi në vështirësi. Çmimet në të gjitha aspektet e jetesës po rriten; elektriciteti po fluturon, çmimet e pronave po ashtu dhe nëse trendi vijon do ta kemi shumë të vështirë menaxhimin”, theksoi Jose Manuel Escamilla, menaxher kafeneje në Madrid.

Tradita ka mbijetuar deri më sot, duke shërbyer si barometër për ekonominë spanjolle, thotë kreu i Konfederatës së Hotelerisë dhe Kateringut.

Një urdhër qeveritar i lëshuar së fundmi rekomandonte që restorantet të ofrojnë “menynë e turistëve” përpara valës së vizitorëve në brigjet spanjolle.

Dekreti parashikon që vakti të përfshijë një supë, pjatën e ditës, ëmbëlsirë, një gotë verë dhe pak bukë.

LEXONI GJITHASHTU

• Ndoqi me thikë klientët se refuzuan të paguanin, në kërkim pronari i restorantit
• Faturat e kripura në Jug, ankesa e denoncime për çmimet në bare e restorante
• ‘Çmimet të afishohen edhe jashtë restorantit’, Kumbaro thirrje bizneseve