KQZ vendos rinumërim të votave për presidentin e ri të Bosnje-Hercegovinës

Komisioni Qendror i Zgjedhjeve i Bosnje-Hercegovinës ka urdhëruar të hënën hapjen e kutive të votimit në Sarajevë për të rinumëruar votat për Republikën Sërpska, për nivelin e presidentit dhe atë të nënpresidentit.

Gjashtë anëtarë të Komisionit kanë votuar në të mirë të vendimit dhe vetëm një ka qenë kundër.

“Në mbledhjen e sotme, Komisioni Qendror i Zgjedhjeve në Bosnje ka shqyrtuar disa ankesa dhe ka pasur qasje në të dhëna dhe video-materiale. Procesi zgjedhor është aq i kontaminuar saqë nuk është e mundshme që të vërtetohet rezultati i saktë”, ka thënë presidenti i këtij Komisioni, Suad Arnautoviç.

Ai ka shtuar se vëzhguesit e akredituar do të informohen në kohë të duhur dhe se fillimisht do të bëhet një analizë e votave të pavlefshme.

Sipas rezultateve të fundit, Millorad Dodik, kandidati i partisë në pushtet, Aleanca e Social-Demokratëve të Pavarur, ka fituar 291.915 vota.

Kundërshtarja e tij, Jellena Triviç, e cila është mbështetur nga partia e saj, Partia për Progres Demokratik, Partia Demokratike Serbe dhe Lista për Rregull dhe Drejtësi, e Nebojsha Vukanoviçit, ka fituar 262.969 vota.

LEXONI GJITHASHTU:

• Paqartësi në Bosnje, Republika Serbe, Dodik dhe rivalja Triviç pretendojnë fitoren
• Dodik për referendumet: Rusia ka kërcënuar integritetin territorial të Ukrainës