Dialogu në SHBA, Haradinaj pranon thirrjen e komunitetit shqiptar për unitet mes partive në Kosovë

Përfaqësuesit e Kosovës dhe Serbisë do të takohen në Shtëpinë e Bardhë më 2 shtator për të biseduar për normalizimin e marrëdhënieve mes dy shteteve.  

Por, nisur nga këto zhvillime të reja komuniteti shqiptar i cili jeton në Amerikë, duket se nuk po qëndron duarkryq. Ata kanë ftuar liderët partiakë në Kosovë, që të zhvillojnë një bisedë virtuale në prag të takimit të 2 shtatorit, takim ky, i cili po pritet me interes të madh për rezultatin që do prodhojë.

Kryetari i Aleancës për Ardhmërinë e Kosovës, dhe ish-kryeministri Ramush Haradinaj ka pranuar ftesën, ndërsa thotë se ky komunitet ka qenë gjithmonë dhe ka shërbyer si urë lidhëse mes shqiptarëve dhe Amerikës.

“Mirëpres ftesën e përfaqësuesve të anëtarëve të një spektri të gjerë të shqiptarëve në Amerikë për një takim interaktiv të përbashkët virtual me liderët e shtetit dhe partive parlamentare të Kosovës, në prag të takimit të 2 shtatorit në Shtëpinë e Bardhë.

Bashkatdhetarët shqiptaro-amerikanë kanë qenë dhe janë boshti i lidhjes sonë të fortë me Amerikën. Gëzimet e shqetësimet i kemi ndarë gjithmonë bashkë”, thotë ai.

Ai thotë se bashkërendimin dhe koordinimi strategjik në këtë moment kyç ku ndodhet vendi është detyrë kryesore për çdo politikan në Kosovë.

Zoti Haradinaj shton se duke qenë të bashkuar dhe në krah me SHBA, shqiptarët mund ta ruajnë dhe ta forcojnë më tej Kosovën e 17 shkurtit të 2008-s, datë në të cilën vendi shpalli pavarësinë nga Serbia.

“Bashkërendimi dhe koordinimi strategjik, në këtë kohë udhëkryqi politik për Kosovën, si në kohërat më të vështira, është jetik. Vetëm të bashkuar dhe krah për krah me Amerikën, shqiptarët do të mund ta ruajnë dhe ta forcojnë Kosovën e 17 shkurtit”, shton Haradinaj.