Greqia pranon t’i njohë si të vlefshme pasaportat e shqiptarëve që skadojnë brenda vitit 2020

Ministria për Evropën dhe Punët e Jashtme të Shqipërisë ka sqaruar vendimin e Greqisë, i cila njoftoi se ka vendosur të njohë pasaportat e skaduara shqiptare deri në datën 31 dhjetor të 2020, kjo dhe për shkak të gjendjes së pandemisë të Covid-19.

Sipas ministrisë, pasaportat do të pranohen si dokumente të vlefshme dhe nuk kanë arsye që emigrantët të shfaqin shqetësime për këtë çështje.

“Ministria për Evropën dhe Punët e Jashtme bën me dije se nga Zyrat e të Huajve të shtetit helen, deri në datën 31 dhjetor 2020, do të pranohen si dokumente të vlefshme të gjitha pasaportat shqiptare, të cilat kalojnë afatin e vlefshmërisë brenda vitit 2020”, thekson ministria.

Vendimi i qeverisë greke nuk do t’i penalizojë emigrantët shqiptarë, por përkundrazi ata brenda afatit të caktuar do të marrin të gjitha shërbimet pa asnjë penalitet.

Ministria e Jashtme sqaron se as emigrantëve shqiptarë nuk do t’u kërkohet leje kalimi në rast të udhëtimit të tyre nga Greqia për në Shqipëri.

“Ky vendim i qeverisë greke krijon lehtësi për emigrantët shqiptarë, të cilët do të mund të marrin shërbimet e nevojshme në shtetin grek, duke përfshirë rinovimin e lejeve të qëndrimit, shërbimet e mbrojtjes sociale, shëndetësore e arsimore. Gjithashtu, emigrantëve shqiptarë nuk do t’ju kërkohet leje kalimi në rast të udhëtimit të tyre nga Greqia për në Shqipëri”, thuhet më tej.