Hapja e shkollave, PD rendit 5 problematikat: Qeveria, asnjë plan konkret për sigurinë e nxënësve

Partia Demokratike përmes ish-deputetes Albana Vokshi akuzoi qeverinë se nuk ka asnjë plan konkret për sigurinë e nxënësve dhe programin mësimor.

Përmes një deklarate për mediat pranë ambienteve të Ministrisë së Arsimit, ish-deputetja e PD tha se vendimi i qeverisë për rihapjen e shkollave pa marrë asnjë masë paraprake dhe pa shtuar asnjë qindarkë në fondin e buxhetit të arsimit, është ‘sa i papërgjegjshëm, aq edhe i rrezikshëm’.

“Ndonëse kanë mbetur më pak se 4 javë nga nisja e shkollave 2020-2021, qeveria nuk ka ende një udhëzim të detajuar, nuk ka një plan masash, nuk ka protokolle të sigurisë për mjediset dhe ambientet  e shkollave. Nuk ka as buxhet shtesë, nuk ka as investime për ujë të rrjedhshëm në çdo shkollë, as masa për dezinfektim të rregullt ditor, as masa për distancim dhe mësim me turne”, u shpreh znj. Vokshi.

Më tej ish-deputetja renditi 5 problematikat që sipas PD kanë aktualisht shkollat, pa zgjidhjen e të cilave nuk mund të sigurohet mbarëvajtja e procesit mësimor dhe shëndeti i fëmijëve.

“1. Me sa turne do të zhvillohet shkolla dhe sa të gjata do të jenë orët e mësimit? Prindërit duhet ta dinë që tani këtë informacion për të marrë masa për kujdesin ndaj fëmijëve, ndërkohë që ata janë në punë. Aktualisht, në Tiranë dhe në Durrës, shumë prej shkollave kanë mësim me 2 turne. Është e rëndësishme të dihet çfarë do të bëhet me programin e dështuar mësimor 3 lëndë në 6 orë.

2. Problemi i dytë lidhet me numrin e nxënësve në një klasë. Ky informacion akoma nuk është dhënë nga qeveria, pasi ajo është e papërgatitur dhe nuk ka akoma një plan për sigurinë e fëmijëve tanë. Pas shembjes së 106 shkollave kanë ngelur pa ambiente mësimore rreth 12 mijë nxënës në Tiranë, Durrës, Krujë, Kavajë dhe Lezhë. Askush nuk di ku do të shkojnë këta nxënës dhe ku do të japin mësim mësuesit e këtyre shkollave.  Asnjë mase shtesë nuk është marrë për transportin për të garantuar distancim fizik.

3. Ndarja në turne dhe ulja e numrit të nxënësve në klasë do të kërkojë rritjen e numrit të mësuesve. Por deri tani nuk ka asnjë njoftim për këtë nga qeveria. Si do të përballohet nga mësuesit, në mënyrë që orët e mësimit të mos bëhen shkel e shko dhe fëmijët të marrin më të mirën e mësimit në klasa? Qeveria nuk ka as për këtë një përgjigje.

4. Problemi i katërt madhor është përballimi nga familjet i shkollave në kushtet e pandemisë. Përveç teksteve dhe mjeteve shkollore, shpenzimet shtohen me maskat apo dezinfektantët për fëmijët. A do të marrë përsipër shteti garantimin e tyre falas? Vetë qeveria ka pranuar se janë mbi 10 mijë nxënës që nuk kanë bërë mësim online për shkak të pamundësisë dhe varfërisë. Si do ta përballojnë rihapjen tani, kur vetëm një fëmijë mund të dojë të paktën 10-20 mijë lekë në muaj maska dhe dezinfektantë?

5. Higjiena në shkolla. Masat antiCOVID lidhen së pari me higjienën, por në shkollat tona nuk ka ujë të rrjedhshëm, ndërsa për sapun apo dezinfektantë të tjerë as që bëhet fjalë. Qeveria e ka detyrim t’u thotë prindërve dhe nxënësve si do të sigurojë kushtet higjieno-sanitare, kur për 7 vjet e gjysem nuk ka bërë asnjë investim në këtë drejtim”, u shpreh ajo.

PD kërkoi nga kryeministri që të rrisë buxhetin për arsimin në mënyrë që të përballohen masat për sigurinë  e fëmijëve.

Lexoni gjithashtu:

Shkollat do të hapen në shtator, ministrja Shahini u kërkon bashkive të nisin pastrimin e ambienteve

Manastirliu: Shkollat, pak gjasa të jenë mjedise të përhapjes së virusit, domosdoshmëri zbatimi i protokolleve të sigurisë

PD akuzon qeverinë se s’ka plan për sistemimin e nxënësve të 106 shkollave që u dëmtuan nga tërmeti