Vaksina s’është fundi i COVID-19, OBSH: Mësoni të jetoni me virusin, përgatituni edhe për sezonin e gripit

Ndërsa shumë shtete evropiane po raportojnë për një rritje të rasteve të reja me coronavirus, Drejtori rajonal i OBSH-së për Evropën Hans Kluge bën thirrje që të gjithë njerëzit duhet të mësohen të jetojnë me Covid-19.Ai po ashtu paralajmëroi të gjitha shtetet të përgatiten edhe për sezonin e ri të gripit i cili po afron.

“Vaksina nuk do të sjellë fundin e pandemisë. Fundi i saj do të arrihet në ditën kur secili prej nesh do të marrë përgjegjësi dhe do të mësojë sesi të bashkëjetojë me virusin. E gjithë kjo varet nga ne dhe ajo ditë mund të jetë edhe nesër. Sezoni i gripit po afron. Tanimë është e rëndësishme që shtetet të monitorojnë ecurinë e gripit dhe të forcojnë mbikëqyrjen për t’u përballur me të dyja viruset. Shtetet duhet të promovojnë vaksinimet e gripit për grupet në rrezik. Ky fakt është më i rëndësishëm se kurrë gjatë këtij viti pasi ne kemi nevojë për të mbrojtur spitalet tona dhe personelin shëndetësor që tashmë po përballen me mbingarkesën nga COVID-19”, tha ai.

Sipas të dhënave të fundit në të gjithë Evropën janë regjistruar 3.3 milionë të prekur me Covid-19 dhe më shumë se 205.000 viktima. Ndërsa në shtete si Spanja dhe Franca është shtuar frika e një vale të dytë të pandemisë.

Komisioni Evropian ka rënë dakord të blejë të paktën 300 milion doza të vaksinës potenciale të COVID-19 nga kompania AstraZeneca.