Basha: Taksa progresive e Ramës ka prodhuar vetëm kaos, plani ynë ekonomik i kthen frymëmarrjen vendit

Kryetari i Partisë Demokratike, Lulzim Basha i është rikthyer akuzave ndaj qeverisë lidhur me ekonominë, që sipas tij është zhytur në kaos për shkak të keqmenaxhimit dhe abuzimit me taksat.

Përmes një postimi të gjatë në Facebook, kreu i PD akuzon kryeministrin Edi Rama se me taksën progresive, e cila sipas tij është  kritikuar fort edhe nga organizatat ndërkombëtare si FMN, ka ‘favorizuar një grusht klientësh dhe oligarkësh dhe e ka vënë shtetin dhe çdo politikë fiskale në shërbim të tyre duke i lënë qytetarët në mëshirën e fatit’.

“Çdo ditë që kalon shqiptarët paguajnë më shumë taksa, ndërsa Rama i përdor ato për të bërë më shumë PPP me klientët e tij. Si pasojë e këtij keqmenaxhimi dhe kësaj arrogance, Shqipëria zhytet në varfëri, njerëzit humbin vendet e punës dhe kriza ekonomike thellohet.

Rama e ka futur dorën thellë në xhepin e çdo qytetari. Ai nuk mendon për njerëzit, por vetëm për nje grusht klientësh dhe oligarkësh dhe e ka vënë shtetin dhe çdo politikë fiskale në shërbim të tyre duke i lënë qytetarët në mëshirën e fatit”, shprehet kryedemokrati.

Sipas tij, plani ekonomik i PD do t’i kthejë frymëmarrjen vendit dhe ekonomisë së njerëzve.

“Më shumë të ardhura në xhepat e tyre dhe më pak taksa. Ne do ti eliminojmë nivelet e shumta të taksave mbi punën, do ti heqim pengesat që vetëm frenojnë zhvillimin dhe do të thjeshtojme të gjithë sistemin.

Ne besojmë se më shumë para në duart e qytetarëve do të nxisin investimin në arsimim dhe kualifikim dhe do t’i japin frymë rritjes ekonomike. Politika jonë fiskale ka në bazë taksën e sheshtë 9% për qytetarët dhe të punësuarit, taksa më e thjeshtë dhe më e ulët në të gjitha vendet e rajonit”, shprehet kreu i PD.