Dorëhiqen gazetarët në Bjellorusi, lajmet japin studion e zbrazur

Me dhjetëra punonjës televizivë, që nga gazetarët e lajmeve e deri te teknikët e studiove, janë duke dhënë dorëheqjen nga mediat shtetërore të Bjellorusisë.

Presidenti bjellorus, Aleksandër Lukashenko, tha se personat në fjalë janë zëvendësuar menjëherë nga punonjës mediatikë rusë.

“I kërkova Rusisë të më japë disa gazetarë hua, për të mbuluar punën e presidentit e për të dhënë shembull sesi bëhet puna e mirë. I njoh këta njerëz”, tha Lukashenko.

Rreth 17 gazetarë dhanë dorëheqjen dhe shfaqën pamjet e një studioje bosh në edicionin e lajmeve, ndërkohë që shumë të tjerë janë duke dhënë dorëheqjen.

Euronews foli me 31-vjeçarin Vadim Shundalov, i cili ka punuar për pesë vite në televizionin shtetëror para se të jepte dorëheqjen më 13 gusht.

Ai thotë se është treguar frikacak që nuk e ka bërë më herët, dhe se në atë media transmetohen vetëm gënjeshtra.

“Është punë që të jep stabilitet financiar. E pranon gënjeshtrën dhe vazhdon punën. Por sivjet ndërgjegjja ime tha që është mbushur kupa”, tha ai.

Ndërkohë, ditën e sotme u mblodhën me mijëra manifestues në MInsk, të cilët protestojnë kundër regjimit të presidentit Lukashenko, i cili e ka mbajtur pushtetin që nga viti 1994.