“Policia me deklarata kontradiktore”, Bajrami: Transparencë për vdekjen e Kurtit

Gazetari Armand Bajrami u shpreh për Euronews Albania, se policia pati kundërshti në deklaratat për vdekjen e 32-vjeçarit Laer Kurti në Komisariatin nr.3 në Tiranë.

Bajrami theksoi se duhet transparencë për ngjarjen e rëndë nga ana e institucioneve.

“Ngjarja është shumë e rëndësishme që të hetohet dhe të zbardhet e gjithë e vërteta. Agjencia e Mbrojtjes Policore ende nuk ka bërë transparencë ashtu siç duhet. Policia pati kundërshti me deklaratat. Askush nuk e di, përveç punonjësve të policisë, se çfarë ka ndodhur. Ngjarja e djeshme lë pika të errëta”, u shpreh ai.

Ngjarja e rëndë ndodhi mbrëmjen e së mërkurës, ku 32-vjeçari u largua me vrap pasi policia i kërkoi mjetin e identifikimit. Pasi efektivët e kapën, e shoqëruan në komisariat. Aty, Kurti nuk u ndje mirë dhe më pas u transportua te Trauma. Policia thotë se humbi jetën në spital, ndërsa Spitali i Traumës njoftoi se erdhi i vdekur.

Nga autopsia e kryer në Institutin e Mjekësisë Ligjore, rezultoi se në stomakun e viktimës është gjetur një qese plastike e çarë me ngjyrë të bardhë me përmasa 5×5 cm, e dyshuar si ambalazh i lëndës narkotike, e cila i është nënshtruar ekzaminimit në Institutin e Policisë Shkencore.

Deri në përfundim të hetimeve, efektivët që e shoqëruan janë pezulluar nga detyra.

LEXONI GJITHASHTU:

• “Duart tuaja me gjakun e shqiptarëve”, thirrje për protestë sot në 20:00
• Pse u shoqëruan efektivët për vdekjen e Laer Kurtit? Gazetari jep detaje
• Prokuroria për vdekjen e 32-vjeçarit: S’kishe shenja dhune në trup, gëlltiti drogë