Përballjet në Ligën e Kombeve, Kosova sfidon në mbrëmje Greqinë

Pas barazimit me Moldavinë, Kosova do të presë sot Greqinë në stadiumin në “Fadil Vokrri” . “Dardanët’ synojnë fitoren e parë në përballjen e dytë të Ligës së Kombeve, në takimin që mund të konsiderohet dhe si “Derbi i Ballkanit”.

Rashica, Shala, Kryeziu, Kololli, Paçarada, Rashani, Muriqi dhe Zhegrova nuk do të jenë pjesë e ekipit për takimit me helenët.

Pavarësisht mungesave të shumta, trajneri Bernard Challandes është besimplotë se grupi që ka në dispozicion do të ketë mundësinë për ta fituar këtë ndeshje. 

“Sa i përket kësaj lige kjo mund të jetë njëra prej ndeshjeve më të rëndësishme. Padyshim që Greqia është favorite, por ne do të mundohemi të fitojmë ndaj tyre. A do kënaqeshim me barazim? Filozofia ime e punës nuk ma lejon ta përgatis ndeshjen për barazim. Sigurisht që nuk do të jetë lehtë, por ne do të kërkojmë të zhvillojmë lojën tonë dhe të fitojmë”, tha ai.

Kosova ndodhet në grupin tre të Ligës C së bashku me Greqinë, Moldavinë dhe Slloveninë.