Demokratët udhëzojnë komisionin gjyqësor të hartojë nenet për procedimin e Trump

Kryetarja e Dhomës së Përfaqësuesve, Nensi Pelosi deklaroi se ka udhëzuar komisionin e çështjeve të gjyqësorit që të hartojë nenet për procedimin e presidentit Donald Trump, në lidhje me përpjekjet e tij për t’i bërë presion Ukrainës për të hetuar rivalin politik.

“Faktet janë të pakontestueshme. Presidenti abuzoi me pushtetin e tij për përfitime politike personale në dëm të sigurisë sonë kombëtare, duke bllokuar ndihmën ushtarake dhe një takim të rëndësishëm në Dhomën Ovale në këmbim të njoftimit për hetimin e rivalit të tij politik”, ka deklaruar Pelosi.

Pelosi e bëri deklaratën e saj një ditë pasi komisioni për çështjet gjyqësore mbajti një seancë dëgjimore me tre ekspertë kushtetues të thirrur nga demokratët, të cilët deklaruan se veprimet e Trump përbënin shkelje të Kushtetutës dhe ishin të hetueshme.

Një ekspert i katërt, i thirrur nga republikanët, e cilësoi hetimin e udhëhequr nga demokratët “të nxituar dhe me defekte”.

Më herët gjatë javës, Komisioni Parlamentar i Inteligjencës miratoi raportin hetimor mbi Trump dhe përpjekjen e tij për të nisur një hetim mbi ish-zëvendës presidentin Joe Biden, i konsideruar rivali kryesor i presidentit në zgjedhjet e 2020-s.

Demokratët në Dhomën e Përfaqësuesve nisin procedurat e shkarkimit për presidentin Trump

Çfarë është “impeachment” dhe si funksionon procedura e shkarkimit në SHBA?