Shkon në 162 numri i viktimave nga tërmeti i fuqishëm në Indonezi

Një tërmet në ishullin kryesor indonezian Java ka vrarë të paktën 162 persona dhe ka plagosur qindra të tjerë, tha guvernatori rajonal Ridwan Kamil.

Tërmeti me magnitudë 5.6 goditi qytetin Cianjur në Javan perëndimore, në një thellësi të cekët prej 10 km, sipas të dhënave të Shërbimit Gjeologjik të SHBA, shkruan BBC.

Ekipet e shpëtimit po punonin gjatë natës në përpjekje për të shpëtuar të tjerët që mendohet se janë ende të bllokuar nën ndërtesat e shembura.

Zona ku goditi tërmeti është me popullsi të dendur dhe e prirur për rrëshqitje dheu, me shtëpi të ndërtuara keq të kthyera në rrënoja në shumë zona.

Më herët, Agjencia Kombëtare e Indonezisë për Zbutjen e Fatkeqësive (BNPB) tha se të paktën 62 persona kishin vdekur, sipas të dhënave më të fundit në dispozicion.

Duke folur për mediat lokale, guvernatori rajonal tha se rreth 326 njerëz ishin lënduar nga tërmeti, duke vënë në dukje se “shumica prej tyre pësuan fraktura nga rrënojat”.

LEXONI GJITHASHTU:

• Mbi 50 viktima dhe 700 të plagosur nga tërmeti në Indonezi
• Tërmeti 5.6 ballë godet Indonezinë, 46 viktima e dhjetëra të plagosur