Mbesa e Khameneit arrestohet për mbështetje të protestave anti-regjim

Represioni i ashpër i demonstratave paqësore të qytetarëve iranianë, që kërkojnë të drejta dhe liri nuk po kursen askënd.

Në pranga ka rënë të enjten edhe Farideh Moradkhani, mbesa e udhëheqësit suprem Ali Khamenei, i cili prej dy muajsh po sheh regjimin e tij t’i lëkundet për shkak të protestave që janë shtrirë në çdo qytet.

E njohur si aktiviste politike për të drejtat e njeriut, Moradkhani është arrestuar në Teheran pse mbështeti manifestuesit, që vijojnë rebelimin pavarësisht qindra viktimave dhe mijëra arrestimeve.

Gjithçka nisi në shtator pas vdekjes së adoleshentes Mahsa Amini, e cila ndërroi jetë teksa ndodhej në duart e policisë, që e kishte arrestuar për shkelje të ligjit islamik me veshjen e saj.

Sipas OKB-së, që atëherë 14 mijë persona janë arrestuar. Organizata kërkon që përdorimi “i panevojshëm dhe i tepruar” i forcës në Republikën Islamike të marrë fund sa më parë.

Arrestimi i mbesës së liderit suprem u konfirmua nga vëllai i saj, Mahmoud Moradkhani, edhe ai kundërshtar i regjimit që jeton në Francë.

Sipas tij, gruaja 36-vjeçare u arrestua dhe u dërgua në burg këtë të enjte, kur u paraqit në zyrën e një prokurori në kuadër të një urdhri gjykate.

LEXONI GJITHASHTU:

• Protestat në Iran, presidenti Raisi: SHBA dështoi të përsëriste Pranverën Arabe
• OKB e shqetësuar për vdekjet në protestat në Iran