Arrestimi i parë i Speciales, pas prangosjes së Mustafës, priten fletë-arreste të reja në Kosovë

Arrestimi i parë nga Zyra e Prokurorit të Specializuar të Salih Mustafës një ditë më parë, pritet të jetë fillimi i prangosjes së personave të dyshuar.

E themeluar me votim të deputetëve të Kuvendit të Kosovës në vitin 2015, Zyra e Prokurorit të Specializuar filloi të marrë në pyetje personat e parë në dhjetor të vitit 2018.

Ishte Rrustem Mustafa-Remi, ish-komandant i Zonës Operative të Llapit të UÇK-së, personi i parë që është ftuar nga hetuesit e Speciales.

Nga ajo kohë, lista e të ftuarve ka vazhduar të shtohet, qoftë si dëshmitarë apo të dyshuar, dhe ka mbërritur deri te presidenti i vendit, Hashim Thaçi, ish-kryetari i Kuvendit, Kadri Veseli, ish kryeministrat Ramush Haradinaj e Agim Çeku.

Bazuar në ligj, Gjykata Speciale, ka juridiksion që të hetojë dhe gjykojë krimet e pretenduara të kryera nga UÇK-ja, gjatë periudhës mars 1998 deri në fund të vitit 2000.