Plagosja e emigrantit egjiptian në Morinë, pezullohet nga detyra efektivi

Agjencia e Mbikëqyrjes Policore ka reaguar sot për incidentin e ndodhur dje në Rrugën e Kombit, ku pas ndjekjes nga policia u plagos me armë një emigrant egjiptian.

Përmes një njoftimi për mediat AMP sqaron se ngjarja ku ka mbetur i plagosur emigranti ka qenë aksidentale, pasi punonjësi i policisë gjatë ndjekjes, në një terren të vështirë dhe në kushtet e errësirës ka rrëshqitur duke bërë qitje të pavullnetshme të armës.

“Në këtë moment, punonjësi i policisë Inspektor K.B. sipas deklarimeve të tij, ka nxjerrë armën dhe pasi ka qëlluar dy herë në ajër ka vazhduar ndjekjen e tyre, por duke qenë terren i vështirë me shkurre dhe lagështirë dhe në kushtet e errësirës është penguar duke kryer qitje të pavullnetshme me pistoletën që mbante në dorë. Për pasojë, është plagosur shtetasi egjiptian M. H. G, i cili ka marrë një plagë me armë zjarri në pjesën e shpinës. Menjëherë, punonjësit e policisë kanë bërë shoqërimin drejt Spitalit Rajonal të Kukësit të shtetasit egjiptian të plagosur, si edhe drejtuesit të mjetit furgon, i cili pësoi lëndime të lehta pasi u rrëzua nga një lartësi rreth 3 metra gjatë ndjekjes nga ana e punonjësve të policisë. Pasi kanë marrë ndihmën e parë në Spitalin Rajonal të Kukësit, ata janë përcjellë për në Spitalin e Traumës Tiranë dhe aktualisht janë jashtë rrezikut për jetën”, thuhet në njoftimin e AMP.

Ndërkohë, është bërë pezullimi nga detyra e punonjësit të policisë, Inspektor K. B., deri në përfundimin e hetimeve mbi këtë ngjarje.

Nga këqyrja e vendit të ngjarjes janë sekuestruar 3 gëzhoja pistolete të tipit GLOK që i përkasin armës së punonjësit të policisë K.B.

Ngjarja ndodhi në orët e vona të mbrëmjes së djeshme në rrugën automobilistike Milot-Kukës, në vendin e quajtur “Rubik”, ku gjatë ndjekjes nga policia ka mbetur i plagosur me armë zjarri një emigrant egjiptian.

LEXONI GJITHASHTU:

• Transportonte emigrantë të paligjshëm kundrejt fitimit, arrestohet 55-vjeçari
• Kapet 30-vjeçari në kërkim, transportoi 7 emigrantë të paligjshëm