Kampionati ballkanik i Taekwondos, pjesëmarrës 460 sportistë

460 sportistë të grupmoshave të ndryshme nga 9 shtete të Ballkanit morën pjesë në kampionatin e 23-të Ballkanik të Taekwondo-s, që u mbajt në Durrës.

Migena Doçi nga Durrësi, pjesë e ekipit kombëtar, arriti të marrë medaljen e bronztë.

Por për të arritur këtu, ajo fillimisht ia fshehu dëshirën mamasë së saj.

“Ishte një dëshirë e imja. Fillimisht vetëm babi e dinte, sepse mamit nuk i pëlqente ideja ngaqë mendonte se ishte një sport për meshkuj. Pastaj nga sukseset e mia filloi t’u pëlqente edhe atyre dhe të dy janë mbështetja ime,” – u shpreh Doçi.

Trajneri i Doçit, Xhersi Kurti thotë se ditët e sotme mentaliteti ka ndryshuar, por nuk kanë financime.

“Të tërheqësh të vegjlit brenda klubit nuk është shumë e vështirë, pasi gjëja kryesore që prindërit sot kërkojnë është të kenë një ambient shumë të mirë dhe komod për fëmijët e tyre, t’ia besojnë njerëzve të duhur dhe pse jo në të ardhmen të krijojnë aftësi për vetëmbrojtje. Më e vështirë është t’i mbash këta të vegjël duke u rritur në klub, sepse dihet që mundësitë janë shumë të vogla për të arritur të financohesh nëpër gara,” – tregoi Kurti.

Si në shumicën e rasteve, financimi bëhet pengesë e talenteve në sporte individuale, që shpeshherë vihen në zgjedhje mes pasionit dhe mundësisë.

LEXONI GJITHASHTU:

• Si të mbrohesh nga dhuna, vajza me shami trajton të rinjtë në sportin Taekwondo
• Taekwondo në Shkodër, pjesmarrës ekipe nga Kosova dhe Italia