Ekonomia shqiptare pritet të tkurret me 7,5 për qind, FMN kundër amnistisë fiskale: Kujdes PPP-të!

Fondi Monetar Ndërkombëtar (FMN) në deklaratën përmbyllëse të misionit virtual në Shqipëri ka bërë të ditur se ekonomia pritet të tkurret me 7.5% ketë vit, nga 5% që ishte pritshmëria në prill, kur sa kishte nisur pandemia.

Fondi ka bërë thirrje për rritjen e të ardhurave dhe një sistem më transparent fiskal. Gjithashtu, FMN është shprehur kundër amnistisë fiskale, ka kërkuar kujdes në menaxhimin PPP, ndërsa e konsideron korporatën e investimeve një risk i shtuar fiskal.

“Ritheksojmë këshillën tonë kundër një amnistie fiskale të mundshme, duke marrë për bazë shqetësimet lidhur me ndikimin që ajo ka mbi zbatueshmërinë e detyrimeve tatimore si edhe me risqet e lidhura me pastrimin e parave dhe me qeverisjen.

Ritheksojmë thirrjen që kemi bërë për një proces të unifikuar për përgatitjen, prioritizimin dhe vlerësimin e të gjitha projekteve të investimeve publike, përfshirë edhe partneritetet publike-private (PPP). Përdorimi i PPP-ve me propozim të pakërkuar duhet të vazhdojë të parandalohet”, thuhet mes të tjerash në përfundimet e FMN-së.