Plotësimi i vakancave, ambasadori i BE-së takim me kryetaren në detyrë të Gjykatës Kushtetuese

Ambasadori i Bashkimit Europian në Shqipëri, Luigi Soreca, është takuar sot me kryetaren në detyrë të Gjykatës Kushtetuese dhe të Këshillit të Emërimeve në Drejtësi, Vitore Tusha. Lajmi bëhet i ditur nga vetë z. Soreca me një shënim në faqen e tij zyrtare në “Twitter”.

Ai thotë se është informuar nga znj. Tusha për punën që po kryhet, me qëllim plotësimin sa më parë të vakancave në Gjykatën Kushtetuese.

Ambasadori i BE-së thekson se bërja funksionale e Kushtetueses është së pari kusht kryesor për forcimin e demokracisë e stabilitetin e vendit, por edhe një “test” i qartë për zhvillimin e Konferencës së parë Ndërqeveritare me BE-në.

“U takova sot me Vitore Tushën, kryetare në detyrë e Gjykatës Kushtetuese dhe e Këshillit të Emërimeve në Drejtësi. Ajo më informoi për punën e Këshillit për plotësimin e pozicioneve të lira në Gjykatën Kushtetuese. Sigurimi i funksionalitetit të saj të plotë është kusht kryesor për të siguruar demokracinë dhe stabilitetin në Shqipëri dhe për zhvillimin e Konferencës së parë Ndërqeveritare për të filluar bisedimet e pranimit”, sqaron Soreca. 

I met today w/ Vitore Tusha, acting President of Constitutional Court and Chair of Judicial Appointment Council (JAC). She informed me about the work of the Council on fulfillment of vacancies in the Constitutional Court. Ensuring its full functionality is a key condition…1/3 pic.twitter.com/v6iVy5RYJU

— Luigi Soreca?? (@LSorecaEU) September 30, 2020

Më tej, diplomati i BE-së përshëndeti veprimet e kreut të shtetit, por dhe Kuvendit, të cilët kanë hapur procedurat për plotësimin e dy vakancave në këtë institucion kyç për zhvillimin e Shqipërisë.

“Ne kemi mirëpritur njoftimet e fundit nga Presidenti Ilir Meta dhe Parlamenti për dy postet e lira dhe kemi ftuar kandidatët e kualifikuar të aplikojnë. Është kritike që KED të finalizojë me shpejtësi vlerësimin dhe renditjen e kandidatëve për postet e lira, duke u bazuar në opinionin e Komisionit të Venecias”, shton ai.

Në fund,  z. Soreca rithekson se Bashkimi Evropian është në krah të Shqipërisë, ndërsa shtoi se vendet e unionit mbështesin konsolidimin e mëtejshëm të reformës në drejtësi.

“Bashkimi Evropian vazhdon të mbështesë Shqipërinë në reformën në drejtësi dhe qëndron pranë saj si një anëtare e ardhshme e Unionit”, shkruan ambasadori i BE-së Luigi Soreca.

Lexoni gjithashtu:

Varhelyi mirëpret rihapjen e garës për në Gjykatën Kushtetuese: Me rëndësi të mos ketë më vonesa

Ambasadori gjerman takon kryetaren e KED: Ngritja e Gjykatës Kushtetuese, kriter për negociatat me BE

Çfarë duhet për negociatat? Gazetari i Ervin Koçi i Euronews Albania shpjegon në Ilva Now

Vakancat në Kushtetuese, KED i dërgon kërkesën Metës e Ruçit: Rihapni garën