Transportuan emigrantë në mënyrë të paligjshme, arrestohen pesë shtetas

Pesë shtetas u kapën duke transportuar 25 emigrantë të paligjshëm në qarkun Korçë.

“Në kuadër të operacionit “Perimetri” janë arrestuar shtetasit me inicialet S. L., 20 vjeç; S. Y., 20 vjeç; E. D., 22 vjeç dhe F. F., 21 vjeç, banues në fshatin Burizanë, Krujë, të cilët janë kapur në dalje të qytetit të Maliqit, duke transportuar në drejtim të Tiranës, me mjetet tip “Range Rover” dhe “Benz”, 21 emigrantë të paligjshëm, të cilëve kundrejt shpërblimit 500 euro për person, iu kishin premtuar kalimin drejt vendeve të BE-së”,- thuhet në deklaratën e policisë.

Burimet policore bëjnë me dije se shtetasi S. L. ka rezultuar person i shpallur në kërkim më parë për veprën penale “Ndihma për kalim të paligjshëm të kufijve kryer në bashkëpunim”.

Gjithashtu është arrestuar në flagrancë edhe shtetasi A. V., 20 vjeç, banues në fshatin Kamenicë, Korçë, pasi u kap në dalje të qytetit të Pogradecit, duke transportuar me mjetin tip “Benz”, katër emigrantë të paligjshëm, të cilëve kundrejt shpërblimit iu kishte premtuar kalimin drejt vendeve të BE-së.

Materialet në ngarkim të tyre i kaluan Prokurorive të Rretheve Gjyqësore Korçë e Pogradec, për veprime të mëtejshme.

Nga raportimet e policisë bëhet me dije gjithashtu se janë rreth 420 emigrantë të huaj të kapur nga nisja e operacionit “Perimetri” ndër to 75 janë shtetas shqiptarë që akuzohen për kalim të paligjshëm të kufirit kundrejt shpërblimit.

Ndërkaq, nga patrullat kufitare në Kapshticë dhe Kakavijë, në bashkëpunim edhe me FRONTEX-in, janë kapur 411 emigrantë të parregullt të kombësive të ndryshme, si dhe janë bllokuar në kufi 2 pasaporta të vjedhura.