Presidenti Meta mesazh urimi homologut gjerman me rastin e 30-vjetorit të Bashkimit të Gjermanisë

Presidenti Ilir Meta i drejtoi një mesazh urimi homologut të tij gjerman, Frank-Walter Steinmeier me rastin e Ditës së Bashkimit të Gjermanisë.

“Më lejoni që me rastin e Ditës së Bashkimit të Gjermanisë, të shpreh në emrin tim dhe të popullit shqiptar, urimet më të ngrohta e të përzemërta për Ju dhe popullin mik gjerman.

Në këtë jubile të rëndësishëm të 30 vjetorit të bashkimit të Gjermanisë, kam kënaqësinë e veçantë të vlerësoj bashkëpunimin e shkëlqyer që ekziston ndërmjet dy vendeve tona, si dhe ndjenjat e thella të miqësisë ndërmjet dy popujve tanë”,- shkruan presidenti Meta në urimin e publikuar në faqen e tij në Facebook.

Presidenti i Shqipërisë me anë të kësaj letre shprehu mirënjohjen e tij për qasjen strategjike të Gjermanisë sa i përket zgjerimit të mëtejshëm të Bashkimit Europian drejt vendeve të Ballkanit Perëndimor.

Z. Meta nuk la pa përmendur dhe kontributin e Gjermanisë  në vendimin politik të këtij viti të Këshillit Europian për të hapur negociatat e anëtarësimit për Shqipërinë.

“Përfitoj nga rasti të shpreh mirënjohjen e thellë për qasjen strategjike të Gjermanisë në mbështetje të zgjerimit të mëtejshëm të Bashkimit Europian drejt vendeve të Ballkanit Perëndimor, si dhe kontributin e saj thelbësor në vendimin politik të këtij viti të Këshillit Europian për të hapur negociatat e anëtarësimit për Shqipërinë.

Mbështetja e drejtpërdrejtë dhe e sinqertë e Gjermanisë mike është mirëpritur nga mbarë populli shqiptar”, shkruan kreu i shtetit, teksa shpreh angazhimin e tij ‘për të nxitur të gjithë aktorët institucionalë të vendit të vijojnë pandalur me reformat dhe plotësimin e kushteve që do të mundësojnë avancimin e procesit të integrimit europian të Shqipërisë’.