Bojkoti i kampionatit, reagon FIFA & UEFA: FSHF dhe qeveria të gjejnë zgjidhje

FIFA dhe UEFA kanë reaguar për bojkotin e kampionatit të Kategorisë Superiore përmes një letre të dërguar Sekretarit të Përgjithshëm të FSHF-së, Ilir Shulku.

Në këtë letër dy institucionet më të rëndësishme të futbollit në botë inkurajojnë krijimin e një kuadri rregullator kombëtar gjithëpërfshirës, që mbështet zhvillimin e futbollit në të gjitha nivelet dhe më konkretisht kërkesat e klubeve të futbollit.

Gjithashtu, FIFA dhe UEFA nxisin qeverinë shqiptare dhe FSHF-në që të gjejnë zgjidhje të arsyeshme dhe të përshtatur për kërkesat e klubeve shqiptare të futbollit në mënyrë që sezoni të fillojë sa më parë.

“FIFA dhe UEFA nxisin qeverinë shqiptare dhe FSHF-në të gjejnë zgjidhje të arsyeshme dhe të përshtatur për kërkesat e klubeve shqiptare të futbollit në mënyrë që sezoni të fillojë pa shtyrje të mëtejshme. Në këto kohë të vështira, fuqia e futbollit për të sjellë gëzim, frymëzim dhe shpresë për njerëzit duhet të mbështetet plotësisht”, thuhet në letër.