Raketa në Ukrainë | Moska: Pranoni kushtet tona, Kievi: Nuk gjunjëzohemi

Forcat ruse kanë bombarduar lindjen dhe jugun e Ukrainës, pak pasi ministri i Jashtëm rus deklaroi se Kievi duhet të pranojë kërkesat e Moskës për t’i dhënë fund luftës, ose do të mundet në fushën e betejës.

Nga ana tjetër, presidenti ukrainas tha se synimet e planifikuara për vitin e ardhshëm janë caktuar dhe do të bëhen publike së shpejti.

“Po hyjmë në vitin e ri dhe duhet të ruajmë unitetin për synimet tona kombëtare. Natyrisht, ky është çlirimi i tokës sonë nga armiku, si dhe rimëkëmbja e Ukrainës, kthimi i qytetarëve tanë në shtëpi, afrimi i mëtejshëm i shtetit tonë me partnerët kyç, krijimi i shanseve të reja për Ukrainën në botë. Të gjitha këto janë detyrat për të ardhmen e afërt dhe jo vetëm për shtetin, por edhe për secilin prej nesh”, u shpreh Volodymyr Zelensky.

Të martën, në qytetin e çliruar të Khersonit u mbajt varrimi i 47-vjeçares Natalya Ryaskova, e cila humbi jetën gjatë bombardimeve ruse, teksa ndodhej në apartamentin e saj. Që nga çlirimi nga trupat tokësore, qyteti vuan nga sulmet e vazhdueshme me raketa.

Rreth 30 kilometra nga Khersoni, fshati i vogël Posad Pokrovske ka mbetur tërësisht i shkatërruar. Ndërsa dimri ka ardhur, ata pak banorë të mbetur po luftojnë për t’u mbijetuar temperaturave të ulëta dhe dëborës së rëndë.

Ndërkohë, pavarësisht izolimit ndërkombëtar, presidenti rus Putin duket se nuk ka ndërmend të ndryshojë strategji.

LEXONI GJITHASHTU

• Protesta iraniane në Francë, demonstratat kundër regjimit islamik zhvendosen në Lion

• Turqia propozon Erdoganin për Çmimin Nobel për Paqen