Komisioneri Varhelyi në Kosovë: Kushtet për liberalizim të vizave janë plotësuar, por duhen bindur shtetet anëtare

Komisioneri për zgjerim dhe fqinjësi të mirë në Bashkimin Evropian, Oliver Varhelyi, vizitoi sot për herë të parë Kosovën, ku mëngjesin e së enjtes zhvilloi takim me kryeministrin Avdullah Hoti.

Gjatë konferencës për shtyp, kryeministri Hoti u shpreh se takimi me Varhelyin ka sjellë lajme të mira për rajonin pasi BE-ja është angazhuar të alokojë 9 miliardë euro fonde për rimëkëmbjen ekonomike të Ballkanit Perëndimor.

Nga ky fond, Hoti tha se do të përfitojë edhe Kosova. Gjatë fjalimit të tij kryeministri i Kosovës u ndal edhe në çështjen e liberalizimit të vizave, ku kujtoi se autoritetet kosovare i kanë plotësuar prej kohësh kushtet, gjë që u konfirmua edhe nga komisioneri Varhelyi, por që ai shtoi se “gjithçka varet nga dakordësia e vendeve anëtare”.

“Nuk ka në asnjë takim të vetëm që nuk e kemi diskutuar këtë çështje, po përpiqem t’i bind shtetet anëtare për nevojën e liberalizimit të vizave, pasi vlerësimi ynë është që ju i keni plotësuar kushtet, por vendimin nuk e marrim ne, e marrin shtetet anëtare, ne na takon të bëjmë propozimin dhe e kemi bërë,” – u shpreh Varhelyi.

Kosova mbetet vendi i vetëm në rajonin e Ballkanit Perëndimor që lejohet të udhëtojë për në vendet e Bashkimit Evropian me regjim vizash, regjim që do të hiqet, siç tha Varhelyi, “vetëm pasi vendet e BE-së të binden se nuk ka krim të organizuar, apo mungesë sundimi ligji”.

Varhelyi u shpreh se BE-ja do të mbështesë planin e zgjerimit sipas metodologjisë së re dhe me planin e ri rajonal do të shtrijë zhvillimin dhe bashkëpunimin.

“Është vendimtare të kemi fushë të përbashkët ekonomike në Ballkan, sepse këto investime do të nxjerrin përfitime vetëm nëse funksionojnv në nivel rajonal,” – u shpreh Varhelyi, i cili tregoi se nga BE-ja kërkohet përshpejtim i reformave.

“Qeveria duhet të angazhohet më shumë për përshpejtimin e reformave ligjore, na duhen të gjitha kapacitetet e nevojshme për t’i shfrytëzuar fondet që do të vijnë nga Brukseli,” – tha Varhelyi.

Komisioneri i përcolli Hotit raportin vjetor të mbajtur nga Brukseli, që sipas tij “e përshkruan situatën mirë, por dhe me detyra specifike se çfarë duhet përmirësuar”.

Gjatë konferencës për shtyp Varhelyi u pyet për dialogun Kosovë-Serbi. Ai tha se për këtë çështje mund të flasë i dërguari i posaçëm për ndërmjetësim, Miroslav Lajčák, por që ai personalisht “po bën gjithçka është e mundur për të ndihmuar”.

Kryeministrit Hoti ndërkohë gazetarët i përmendën deklaratat e thëna në studio televizive dhe i kërkuan qartësi se çfarë do të bëhet nëse dialogu nuk do të ketë rezultate.

“Dy deklaratat e mia qëndrojnë dhe nuk janë kontradiktore, kemi hyrë në dialog për marrëveshje paqeje dhe normalizim të plotë të marrëdhënieve, kjo vetëm me njohje reciproke. Jemi të përkushtuar për dialog, nëse e përmbyllim këtë do ishte shumë mirë për ne, ata, rajonin dhe BE-në. Por nëse nuk arrihet kjo, e them sërish, do të vazhdojmë si më parë, si dy shtete të pavarura, fqinje, por që nuk e njohin njëra-tjetrën,” – tha Hoti.