“Antishpifja”, Thano: Rama ka obsesion të pazakontë me median. Cukali: Ligj anti-evropian

Ambasadori i Bashkimit Evropian, Luigi Soreca deklaroi se Shqipëria nuk ka bërë asnjë përparim në fushën e lirisë së shprehjes. Gjatë prezantimit të raportit vjetor të Komisionit Evropian në Këshillin Kombëtar për Integrimin, Soreca theksoi se amendamentet e paketës së antishpifjes janë larg standardeve ndërkombëtare.

Adrian Thano, kryeredaktor i gazetës “Dita” tha se, në Shqipëri të gjithë kryeministrat nuk kanë pasur raport të mirë me mediat.

“Në 24 vjet që merrem me media nuk kam parë ndonjë periudhë kur kryeministrat të kenë pasur ndonjë raport të shëndetshëm me median, Rama nuk bën përjashtim nga kjo antikulturë politike karshi medias”, tha Thano.

“Mua më habit, një paradoks i qartë dhe deri diku qesharak i raporti të mazhrancës me projektligjet. Nëse e keni vënë re, në të gjithë këto projektligj që kanë shkaktuar debat ka pasur të njëjtin qëndrim; këtë e kërkon BE, këtë e kërkojnë ndërkombëtarët. Por tani si ka mundësi që është kaq këmbëngulës kur ndërkombëtarët i thonë ‘Stop’”, shtroi kryeredaktori i gazetës “Dita”.

Koloreto Cukali, drejtor i Këshillit Shqiptar të Medias theksoi se ligji në fakt nuk lypet nga ndryshimi i teknologjisë së informacionit por zyrtarët e thonë për t’u justifikuar. Gjithashtu, Cukali tha se, Gjermania merret si shembull, por çështjet zgjidhen në gjykatë.

“Ligji është komplet anti-evropian. Ligji nuk ka lidhje fare me teknologjinë, e gjitha kjo është një absurd. Këta  duan ta nxjerrin gjykatën jashtë loje me këtë ligj dhe t’i japin përgjegjësi AMA-s. Ligji gjerman nuk përfshin AMA-n, Gjermania është e vërtetë se ka një ligj që rregullon mediat por është ligj për gjykatat. Vendosin gjykatat”, u shpreh Cukali.

Ardian Thano shtoi më tej se, nuk mundet që një institucioni, kryetari i të cili emërohet nga kryeministri të kontrollojë mediat. “Kryeministri ka një obsesion të pazakontë me median”, tha ai.

Intervista e plotë: