BE-ja dënoi ashpër dhunën politike në Brazil 

Përfaqësuesi i Lartë për Politikën e Jashtme, Josep Borrell, në emër të Bashkimit Evropian, dënoi ashpër “aktet tronditëse të dhunës politike dhe sulmin e papranueshëm ndaj demokracisë” në Brazil.

Ai shprehu solidaritetin me Presidentin Lula dhe institucionet braziliane në mbrojtje të demokracisë.

Borrell përshëndeti përpjekjet për të hetuar ata që janë përgjegjës për sulmet ndaj demokracisë braziliane dhe për akte vandalizmi kundër pronës publike dhe trashëgimisë historike kombëtare.

Në deklaratë, BE-ja rikujton se ushtrimi i të drejtave dhe lirive demokratike duhet të bëhet duke respektuar Kushtetutën dhe institucionet e zgjedhura në mënyrë demokratike.