Nga e enjtja të gjithë me maskë! Ardi Veliu rikujton masat ndëshkuese për ata që s’e respektojnë

Duke filluar nga dita e enjte të gjithë qytetarët duhet të përdorin maskë në çdo ambient, përjashto baret, restorantet dhe ambientin shtëpiak.

Drejtori i Përgjithshëm i Policisë së Shtetit, Ardi Veliu me një deklaratë për mediat ftoi qytetarët të respektojnë masat e reja, pasi në të kundërt do të përballen me sanksione administrative.

“Rastet e shtetasve të infektuar me COVID-19 kanë shënuar një rritje të lehtë, sipas të dhënave nga Shëndetësia. Një rritje e tillë e të infektuarve po vërehet edhe në shumë vende të botës. Disa prej këtyre shteteve kanë nisur marrjen e masave të forta për parandalimin e infeksionit. Edhe në vendin tonë kanë nisur të merren disa masa në mënyrë që të pengohet përhapja masive e virusit. Duke filluar nga dita e enjte, çdo qytetar është i detyruar të mbajë maskën mbrojtëse që në momentin kur del prej shtëpisë së vet’, tha Vliu. 

Sipas tij, aplikimi i kësaj mase nuk ka për qëllim ndëshkimin e qytetarëve, por synon rritjen e vigjilencës për të luftuar virusin dhe shkëputur zinxhirin e transmetimit në nivel komunitar.

“Qëllimi kryesor është të mbrojmë popullatën nga rreziqet që paraqet virusi. Së dyti, me marrjen e një mase të tillë, synojmë edhe të shmangim një mbyllje si ajo e pranverës së këtij viti. Për qytetarët është më e lehtë të mbajnë një maskë dhe të zbatojnë rregullat e distancimit social, sesa t’u nënshtrohen kushteve të rrepta të mbylljes.Ndaj duke besuar se qytetarët do të jenë në krahun tonë, për t’i minimizuar efektet e pandemisë, bëj thirrje që të gjithë bashkë të tregojmë se vetëm duke respektuar rregullat mund të ndërpresim zinxhirin e transmetimit të këtij virusi të rrezikshëm”, tha Veliu.