Lajçak në Prishtinë, Hoti i vendosur: Në tavolinën e bisedimeve ulemi vetëm për njohje reciproke

Përfaqësuesi i Posaçëm i Bashkimit Evropian për Dialogun Beograd-Prishtinë, Miroslav Lajçak mbërriti të martën në Prishtinë për të diskutuar përparimin e bërë që nga rinisja e Dialogut të lehtësuar nga BE-ja në muajin korrik, si dhe hapat e ardhshëm në negociatat e marrëveshjes gjithëpërfshirëse.

 Pas takimit me Kryeministri Avdullah Hoti, ky i fundit mbajti një konferencë për media ku nënvizoi edhe një herë se Kosova në asnjë mënyrë nuk është duke e bllokuar dialogun.

Kryeministri i Kosovës deklaroi se është dakorduar edhe me partnerët ndërkombëtarë që Kosova do ulet në tavolinën e bisedimeve vetëm për marrëveshje përfundimtare për njohje reciproke midis dy vendeve.

“Kosova për herë të parë ka qasje konstruktive në dialog, dhe nuk jemi duke e bllokuar atë. Pas dy viteve të bllokadës kemi hyrë në këtë proces dhe është mburri dakordim edhe me partnerët ndërkombëtarë që të  ulemi në tavolinën e bisedimeve vetëm për marrëveshje përfundimtare për normalizim të plotë të marrëdhënieve dhe njohje reciproke”, tha ai.

Edhe Kryetarja e Kuvendit të Kosovës, Vjosa Osmani ka pritur në takim të dërguarin special të Bashkimit Evropian për dialogun, Miroslav Lajçak.

Në këtë takim, kryetarja Osmani ka thënë se çfarëdo marrëveshje, e cila nuk është e pranueshme për Kuvendin, do të mbetet e paratifikuar dhe rrjedhimisht e pazbatueshme. Në komunikazë për media, kryetarja Osmani citohet të ketë deklaruar se sistemi kushtetues i Kosovës dhe unitariteti i vendit janë të pacenueshëm dhe nuk duhet të jenë pjesë e negociatave.

Pas takimit me kryeministrin Avdullah Hoti dhe kryeparlamentaren Vjosa Osmani, si dhe takimit të mbajtur me dyer të mbyllura me disa organizata joqeveritare, i dërguari i posaçëm i BE-së për dialogun Kosovë/ Serbi, Miroslav Lajçak, ka përmbyllur takimet e sotme.

Ndërkohë, gjatë ditës së nesërme, ai do të ketë takime të tjera me zyrtarë të ndryshëm e liderë të partive politike, shqiptare, serbe e pakicave të tjera.