Akuza për komplot ndaj ish-presidentit francez Sarkozy

Ish-presidenti francez Nicolas Sarkozy po përballet me akuza të reja në lidhje me financimin ilegal të fushatës së tij elektorale në vitin 2007.

Lajmin e bëri të ditur zyra e prokurorit të posaçëm, duke konfirmuar kështu edhe raportimet e mëhershme në media.

Sarkozy, që edhe njëherë u vetëdeklarua i pafajshëm në profilin e tij në Facebook, tani akuzohet për “komplot” në lidhje me financimet libiane të fushatës së tij.

Në vitin 2018, Sarkozy, që qeverisi Francën mes viteve 2007-2012, ishte akuzuar për financime ilegale dhe korrupsion pasiv.

“Pas 4 ditë marrje në pyetje, gjatë të cilave u përgjigja për gjithçka, pafajësia ime është hedhur sërish poshtë me një vendim të pashoqëruar nga provat që duhet të tregojnë financimin ilegal”, deklaroi Sarkozy në rrjetet sociale.

Ish-presidenti, që pretendon se është viktimë e një komploti, është i dyti kryetar shteti i Francës që përballet me drejtësinë, pas paraardhësit të tij Jacques Chirac.