Njësia policore shpërbëhet pas vrasjes së 29-vjeçarit në SHBA

Departamenti i Policisë së Memfisit ka shpërbërë të ashtuquajturën njësi speciale Scorpion, oficerët e së cilës akuzohen për vrasjen e Tire Nichols.

Scorpion do të thotë “Operacioni i krimeve në rrugë për të rivendosur paqen në lagjet tona”.

Njësia është një njësi prej 50 personash me mision uljen e niveleve të krimit në zona të veçanta.

Por tani ajo është duke u shfuqizuar pasi oficerët e saj u panë duke rrahur 29-vjeçarin, në videot e 7 janarit.

Në një deklaratë, departamenti tha se “është në interesin më të mirë të të gjithëve që të çaktivizohet përgjithmonë” njësia.

“Ndërsa veprimet e urryera të disave hedhin një re çnderimi mbi titullin Scorpion, është e domosdoshme që ne, Departamenti i Policisë së Memfisit, të ndërmarrim hapa proaktivë në procesin e shërimit për të gjithë të prekurit”, shtoi ai.

Familja e Nichols e mirëpriti vendimin në një deklaratë nga avokatët e tyre, duke e quajtur atë “të përshtatshëm dhe proporcional me vdekjen tragjike të Tire Nichols, dhe gjithashtu një vendim të denjë dhe të drejtë për të gjithë qytetarët e Memfisit”.

LEXONI GJITHASHTU:

• SHBA në kaos, shpërthejnë protestat në mbarë vendin pas vrasjes së 29-vjeçarit
• Pesë ish-policë në SHBA akuzohen për vrasjen e një personi me ngjyrë