Komisioni i Medias ndryshon gjobën për portalet

Me propozim të dy relatorëve Milva Ikonomi dhe Musa Ulqini, në komisionin e Medias u miratua ndryshimi i gjobës për portalet, duke përcaktuar një maksimum prej 40 mijë lekësh.

Gjobat do të varionin nga 100 mijë deri në 1 milion lekë në rast shkeljeje, ndërsa në raste kur nuk respektohet vendimi i Këshillit të Ankesave gjoba do të arrijë deri në masën 40 mijë lekë, duke përfshirë ndryshimet e fundit.

Një prej pikave që ka ngjallur më shumë debat nga grupet e interesit për paketën Anti-Shpifje është neni 28, pika 8 ku theksohet se nëse një portal ankimon një vendim, nuk e shmang atë nga detyrimi i shlyerjes së gjobës të vendosur nga  Këshilli i Ankesave.  

Disa nga deputetët e maxhorancës si Musa Ulqini dhe Fidel Ylli kërkojnë përmirësimin e këtij neni.

Në mbledhjen e  Komisionit të mediave u miratua që në përbërje të Këshillit të Ankesave, organ vendimmarrës i AMA-së, të ketë edhe juristë, përveç gazetarëve. 

Në draftin e miratuar më herët ishte parashikuar që të kishte vetëm gazetarë me eksperiencë dhjetë-vjeçare.