Më shumë masa kufizuese, vijon të rritet numri i të infektuarve në Itali, Belgjika masa izoluese

Situata nga COVID-19 vijon të jetë shqetësuese në të gjitha vendet e Evropës.

Ditën e premte, Ministria Italiane e Shëndetësisë bëri të ditur se numri i rasteve të reja të konfirmuara me COVID-19 në vend arriti në 31.084, çka përbën numrin më të lartë që nga shpërthimi i epidemisë. Në shtetin fqinj u raportuan 199 viktima ne 24 orët e fundit, duke e çuar numrin e përgjithshëm të vdekjeve në 38,321.

Italia ka raportuar gjithsej 647.674 raste të konfirmuara. Ndër 325,786 raste aktive ekzistuese, 1746 ndodhen në kushte kritike.

Sipas monitorimit nga Instituti Italian i Shëndetit, nga 8 tetor deri më 21 tetor, shkalla e infeksionit në vend ishte 1.7, teksa mesatarja e infektimeve ishte 280 persona për 100.000 banorë. Ekspertët shprehen se pandemia po përkeqësohet me ritme të shpejta në Itali.

Në rajonin jugor të Kampoanjes u raportuan, 3186 raste të reja në 24 orët e fundit. Kreu i rajonit Vincenzo De Luca tha se repartet e përgjithshme të spitaleve lokale ishin nën presion të madh. Të gjitha shkollat, përfshirë kopshtet, u kërkohet të ndërpresin mësimet për dy javë duke nisur nga 2 nëntori.

Belgjika është shteti i radhës evropian që po ashtu ashpërson masat anti-COVID.

Bizneset jo thelbësore do të mbyllen dhe punonjësit duhet të punojnë në distancë. Pushimet shkollore në vend do të zgjaten deri më 15 nëntor. Qytetarëve do të lejohet vetëm një vizitor në shtëpi dhe duhet të dalin vetëm në grupe me një maksimum prej katër personash.

“Është një bllokim, por do të lejojë fabrikat të veprojnë, shkollat të rihapen duke qenë të kujdesshëm pas 15 nëntorit dhe kjo nuk do t’i lërë njerëzit të izoluar, – tha ministri i Shëndetësisë, duke shtuar se vendi është në një urgjencë shëndetësore. Presioni mbi spitalet është i madh dhe personeli i kujdesit shëndetësor po bën përpjekje mbinjerëzore për të shpëtuar jetë çdo ditë”, shtoi ai.

Belgjika tanimë ka më shumë pacientë me COVID-19 në spitale sesa në kulmin e valës së parë në pranverë.