Tërmeti në Izmir, mjeku Brezhnica: Nuk dihet ende numri i atyre që kanë ngelur nën gërmadha

Në një intervistë për Euronews Albania mjeku Besnik Brezhnica në Izmir, foli rreth gjendjes në spitale nga të lënduarit e tërmetit të së premtes me epiqendër në brigjet e detit Egje ku sqaroi se pjesa më e madhe e atyre që kanë pasur plagë tashmë janë jashtë rrezikut.

“Gati 1000 persona ishin lënduar, shumica e tyre kanë dalë nga spitali. 200 persona janë akoma në spital për fat të keq dhe vazhdon kurimi i tyre ndërsa për numrin e personave të vdekur, për fat të keq vazhdon të rritet akoma. Vetëm mbrëmë patëm një lajm të mirë se një vajzë 14-vjeçare pas 58 orësh u shpëtua,” – tha mjeku.

Në fjalën e tij mjeku tregoi se kur njerëzit ngelen nën gërmadha, traumat janë të mëdha dhe pjesa më e madhe e atyre 200 personave që gjenden në spital janë në reanimacion.

Ai tha se kërkimet po vazhdojnë pa u ndalur dhe se nuk dihet ende numri i saktë i personave që nuk janë nxjerrë nga rrënojat.

Sa i përket gjendjes në qytetin e Izmirit, Brezhnica tha prej pandemisë shkollat nuk kanë nisur dhe fëmijët kanë qenë të gjithë në shtëpitë e tyre, teksa theksoi se grupmosha e vogël e kap pësuar më keq nga pjesa tjetër. Gjithashtu qytetarët kanë frikën e tërmeteve të tjera dhe kjo e bën gjendjen edhe më alarmante.

Një tërmet i fuqishëm ka tronditur Turqinë dhe Greqinë mesditën e së premtes. Autoritetet turke raportuan se lëkundja më e fortë u regjistrua rreth orës 14:51 (me orën lokale) me magnitudë 6.6 të shkallës Richter me epiqendër 16.5 kilometra në jugperëndim të Izmirit, 13 kilometra larg ishullit grek të Samos në Egje.

Lexoni gjithashtu: 

Tërmeti i fuqishëm në detin Egje shkakton viktima dhe dëme të mëdha në Turqi e Greqi

Tërmeti në Turqi, sizmiologu shqiptar: Priten pasgoditje të tjera me magnitudë të konsiderueshme

”Nën rrënoja ende dëgjohen zëra”, Gazetari shqiptar në Izmir: Tërmeti la rreth 20 mijë të pastrehë

Tërmeti në Izmir, zv.drejtori i Gjysmë Hënës së Kuqe për Euronews Albania: Këshillat që duhet të ndjekin njerëzit