Gara në Amerikë, Edmond Haxhinasto: Sfidat që e presin SHBA-në pas zgjedhjeve

Ish-ministri i Jashtëm i Shqipërisë, Edmond Haxhinasto komentoi zhvillimet e fundit mbi zgjedhjet në Shtetet e Bashkuara të Amerikës, ku presidenti aktual Donald Trump ka përballë kandidatin e demokratëve, Joe Biden.

Por, cilat janë efektet dhe përfitimet që mund të prodhojë fitorja e njërit apo tjetrit kandidat për jetën e amerikanëve, për këtë z. Haxhinasto bëri këtë analizë: “Ka shumë parashikime. Sa i takon tregjeve unë i kam parë me vëmendje .Të dyja platformat e të dy kandidatëve nuk i kanë trembur tregjet. Pas zgjedhjeve thuhet se do të ketë një rikuperim të ekonomisë. Trendi është pozitiv dhe tregjet do ta akomodohen pozitivisht. Patjetër, që me mbarimin e zgjedhjeve është se çfarë do të bëjnë ato me platformat që ata i kanë bërë publike. Sfida më e madhe është menaxhimi i pandemisë, pastaj formatimi i Kongresit dhe Senatit. Ka sfida të mëdha edhe përtej SHBA, për Kinën, Korenë e Veriut, megjithëse nuk ka dalë shumë si çështje. Amerikanët kanë pranuar një realitet dhe një përqasje të Trump, një pragmatizëm të  tij, dhe në marrëdhëniet me shtetet shikon si është fitimi, por sigurisht kjo ka një faturë që vjen më pas”, tha ai.

Edhe pse politika shqiptare nuk ka folur publikisht për dëshirat mbi fituesin e mundshëm të zgjedhjeve në SHBA, ish-ministri Haxhinasto shtoi se qasja e SHBA-së për Shqipërinë në politikën e jashtme do vijojë të mbetet e palëkundur.

“Unë mendoj se marrëdhëniet e Shqipërisë me SHBA janë të konsoliduara. Ne kemi pasur një konvergjencë për politikën ndërkombëtare për rajonin. Qëndrimi i SHBA ka qenë themelor edhe për pavarësimin e Kosovës”, shtoi ai.

Për z. Haxhinasto sfida më e madhe e presidentit të ri është të krijimi i unitetit mes amerikanëve, pasi aktualisht mungon një qasje e tillë.

“Populli amerikan ka një polarizim të jashtëzakonshëm. Dëshiroj që SHBA të kthehen në rolin e liderishipit në organizatat ndërkombëtare. Ato kanë qenë ruajtës të standardeve. Kjo besoj se do të jetë në interesin e të gjithë shqiptarëve, arritjet e shqiptarëve kanë ardhur si rezultat i SHBA në këto organizata, prandaj dëshira jonë është që zgjedhjet të shkojnë normalisht”, tha ai.

Lexoni gjithashtu: 

Shtetet ‘e lëkundura’ të Amerikës, aty ku vendoset fati i zgjedhjeve presidenciale të SHBA

Zgjedhjet në SHBA 2020, 10 momentet kulmore të fushatës, nga inkriminimi tek COVID