Kryeredaktori i gazetës “Dielli”: Shqiptarët kanë nevojë për mbështetjen e të dy palëve

Dalip Greca, kryeredaktor i gazetës “Dielli” në SHBA thotë se, si organ i shoqatës “Vatra” ata nuk kanë mbajtur një qëndrim zyrtar në këto zgjedhje duke mos shprehur preferencë për asnjë prej kandidatëve.

Z. Greca u shpreh nga ana tjetër, se Donald Trump ka merita për zhvillimin ekonomik të SHBA ndërsa nga ana tjetër veçoi kontributin e Jode Biden për shqiptarët.

“Gazeta Dielli është organ i federatës Vatra dhe Vatra nuk ka dalë në deklaratë pasi ecën me parimin që shqiptarët kanë nevojë për mbështetjen e të dy palëve. Gazeta “Dielli” në editorialin e fundit ka mbështetur idenë që t’i kemi dyert e Uashingtonit të hapura”, tha ai.

Kryeredaktori i gazetës “Dielli” edhe pse nuk preferoi ta deklaronte votën, qëndrimi i tij ishte pro Trump.

“Trump po tërheq investimet e Amerikës jashtë dhe po i rikthen në SHBA. Kjo ka efekt në punësimin e njerëzve dhe ndikim të drejtpërdrejtë në ekonomi. Shifrat e papunësisë janë më të ulëtat të dekadave të fundit. Mendoj që të kërkosh kujdesin në hapjen e ekonomisë duke rrezikuar akoma ekonominë e SHBA nuk besoj se është alternative e duhur për t’i dhënë impuls ekonomisë”, deklaroi z. Greca.