Deklaratat e kandidatëve për president në SHBA, diplomati Halili: Trump e parandjen se nuk do të fitojë

Në një intervistë për Euronews Albania, diplomati Muhamet Halili nga Shkupi tha se deklarata e Trump për ta çuar procesin zgjedhor në Gjykatën Supreme është një lloj parandjenje e tij për humbjen.

“Kam përshtypjen se ai përgatit terren që opinionit dhe simpatizantëve të tij t’u tregojë se ja ne fituam por mangësitë e sistemit zgjedhor dhe aftësia e z. Biden dhe ekipit të tij për t’i manipuluar zgjedhjet, humbëm,” – u shpreh diplomati.

Sipas tij Trump nuk është në gjendje për ta përballuar humbjen eventuale, gjë që e ka deklaruar deri më tani disa herë.

Muhamet Halili tha për Euronews Albania se rizgjedhja e Trump si president nuk do të ishte diçka e mirë për Amerikën sepse ai me veprimet e tij e ka izoluar SHBA-në.

“Unë konsideroj se një fitore eventuale e z. Biden do të ishte një rikthim i Shteteve të Bashkuara në skenën ndërkombëtare,” – u shpreh Halili teksa theksoi se shqiptarët po presin me mish e me shpirt fitoren e Joe Biden.

Ai tha se Joe Biden është një politikan i dëshmuar për çështjet e Ballkanit Perëndimor si njohës shumë i mirë i tyre dhe në veçanti për çështjen e Kosovës, ndaj për ne sipas Halilit do të ishte pozitive fitorja e demokratëve