Sekuestrohen 260 pako dhe 46 thasë me mallra kontrabandë, arrestohet 43-vjeçari

260 pako dhe 46 thasë me mallra të ndryshme janë sekuestruar ditën e sotme në Tiranë, ku në pranga ka rënë administratori i një poste private, ndërsa janë proceduar në gjendje të lirë 3 punonjës të kësaj poste.

Në kuadër të operacionit të koduar “Pakot Postare” është arrestuar shtetasi A. Sh., 43 vjeç, banues në Lezhë, administrator i një poste private.

Gjithashtu, nisi procedimi në gjendje të lirë për shtetasit D. P., 27 vjeç, E. M., 46 vjeç, të dy banues në Tiranë, dhe M. S., 18 vjeç, banues në Mamurras, të tre punonjës të kësaj poste.

“Gjatë kontrollit të magazinave të postës në administrim nga shtetasi A. Sh., në Linzë, shërbimet e Policisë gjetën dhe sekuestruan, në cilësinë e provës materiale, 260 pako dhe 46 thasë me mallra të ndryshme (veshje, produkte kozmetike, medikamente mjekësore, pajisje elektronike etj), pa fatura tatimore shoqëruese apo deklarata doganore për origjinën e mallrave”- njofton policia.

Në vijim të kontrolleve u gjetën edhe disa pako me logon e një poste tjetër, të papajisura me fatura apo deklarata doganore.

Vijon puna për kapjen e administratores së kësaj poste, shtetases A. Gj.

Nga veprimet hetimore dyshohet se mallrat e sekuestruara janë futur kontrabandë në Shqipëri. Vijon puna hetimore për dokumentimin e plotë të kësaj veprimtarie të kundërligjshme.

LEXONI GJITHASHTU: 

• Sekuestrohen 260 pako dhe 46 thasë me mallra kontrabandë, arrestohet 43-vjeçari
• Vritet shkencëtari që projektoi vaksinën ruse të koronavirusit