Udhëheqësit shqiptarë urojnë Joe Biden për fitoren

Pas fitores së Joe Biden si presidenti i 46-të i Shteteve të Bashkuara të Amerikës, udhëheqësit shqiptar, përmes postimeve në Twitter kanë uruar fitoren e tij.

Kryeministri Edi Rama shprehu kënaqësinë për bashkëpunimin me administratën Trump teksa uroi kryetarin e ri të Shtëpisë së Bardhë.

“Ishte një privilegj e kënaqësi bashkëpunimi me presidentin Trump e administratën e tij dhe duke uruar presidentin e zgjedhur të SHBA-së Joe Biden për fitoren e tij spektakolare, jam i lumtur të vijoj bashkëpunimin për forcimin e partneritetit strategjik me Shtetet e Bashkuara,” – thuhej në postimin e Ramës.

Ndërkaq edhe kryedemokrati Basha ka shprehur urimet e tij për Biden.

“Urimet e mia më të përzemërta për Joe Biden në zgjedhjen e tij si President i SHBA-së. Shqipëria dhe shqiptarët janë krenarë për miqësinë dhe aleancën tonë. Partia Demokratike synon të vazhdojë punën me partnerët amerikanë për të forcuar vlerat dhe angazhimin tonë të përbashkët,” – u shpreh Lulzim Basha.

Presidenti i vendit, Ilir Meta ka shkruar gjithashtu në faqen e tij në Twitter urimin për homologun e tij dhe zv presidenten Harris.

“Urime për Joe Biden dhe Kamala Harris për fitoren e tyre në zgjedhjet e 2020-tës në SHBA. Synojmë të punojmë me presidentin e zgjedhur Biden për të forcuar lidhjet dhe partneritetin tonë strategjik,” – shkroi Meta.

Lexoni gjithashtu: 

“Mik i popullit të Kosovës”, Albin Kurti uron Joe Biden për fitoren e zgjedhjeve në SHBA

Liderët botërorë përgëzojnë Biden për fitoren