Ende pa fitues zyrtar, Nesho: Rezistenca e Trump kaotike, njësoj si një pjesë e presidencës së tij

Njësoj siç paralajmëroi dhe Donald Trump do të ishte një tranzicion jo i lehtë kalimi nga njëri president te tjetri në këto zgjedhje në Amerikë.

“Është një rezistencë kaotike, ashtu siç ishte dhe një pjesë e presidencës së Trump,” – kështu u shpreh Agim Nesho për Euronews Albania.

Ish-ambasadori i Shqipërisë në OKB ishte i mendimit se kontestimi po bëhet jo sepse Trump nuk pranon humbjen por si një përpjekje për t’iu imponuar republikanëve duke deligjitimuar zgjedhjet e tanishme.

Sa i përket reagimeve nga republikanët, Agim Nesho theksoi se janë të pritshme.

“Elementë kryesorë të partisë republikane, tashmë nuk është se janë ndërgjegjësuar, kanë qenë plotësisht dakord dhe e kanë parë me vëmendje reagimin e elektoratit por në kuptimin që çështja ka arritur të shkojë në një krizë institucionale brenda vendit mendoj që ata do të shprehen gjithnjë e më shumë në favor të një tranzicioni të butë dhe me kalimin e administratës presidentit të zgjedhur Biden,” – u shpreh Nesho.

Ndër të tjera ai solli në vëmendje dhe çështjen e Kosovës, e cila me administratën Biden do të ketë më shumë prioritet.

“Me presidencën Biden do të kemi një rikthim në politikat normale të njohura prej nesh në vlerësimin e Kosovës si një faktor me sovranitet të plotë dhe jo ashtu siç u trajtua nga administrata e presidentit Trump,” – tha Agim Nesho.

Lexoni gjithashtu:

SHBA ende pa një fitues zyrtar, Trump vijon betejën ligjore