Mbyllet greva, naftëtarja për Euronews Albania: Zgjodhëm të keqen më të vogël, jemi të mbytur në borxhe

Pas takimit të zhvilluar një ditë më parë naftëtarët kanë pranuar ofertën e propozuar nga kryeministri Edi Rama për një mbështetje financiare nga ana e qeverisë.

Naftëtarja Mejreme Ferzaj, e cila bashkë me koleget e saj qëndroi për 26 ditë në grevë urie tha për Euronews Albania se greva ishte një sakrificë që ja kishte vlejtur deri diku.

Në një mendje me kreun e Sindikatës së Naftëtarëve, Sokol Dautaj ajo tha se naftëtarët, nga dy të këqija, kishin zgjedhur të keqen më të vogël të detyruar nga kushtet financiare.

“Ishim të detyruara se nga janari e këtej jemi pa bukë, jemi të mbytur në borxhe. Paga do të na jepet derisa në uzinë të paraqitet firma që të fillojë puna.

Nuk na është thënë sa do të jetë paga, por ne ramë dakord sepse jemi pa punë, pa lekë”, tha naftëtarja, teksa përshëndeti kryeministrin për arritjen e kësaj marrëveshjeje.