Tirana nën orët policore, patrullime dhe 17 post-blloqe për të monitoruar respektimin e masave të reja kufizuese

Mbrëmja e parë me masat e reja kufizuese për parandalimin e përhapjes së COVID-19 vijoi të mërkurën me 17 post-blloqe të ngritura nga policia vetëm në Tiranë.

Teksa plot mjedise publike, të frekuentuara mjaftueshëm në ditët e shkuara, sot u zbrazën pas orës 22:00, shumë patrulla policie nisën fill të njoftonin qytetarët për të shmangur lëvizjet, ndërkohë që baret dhe restorantet nisën të mbylleshin.

Në gjithë kryeqytetin policia ka parashikuar patrullime të shumta, kryesisht në zonat e njohura për lëvizje në orët e mbrëmjes si: ish-Blloku, Komuna e Parisit, zona e Astirit etj.

Për të parë mbarëvajtjen, por dhe angazhimin e policisë në zbatimin e aktit normativ që miratoi së fundmi qeveria, në terren ka dalë edhe drejtoria e standardeve profesionale në policinë e shtetit.

Pak ditë më parë, me këshillë të Komitetit Teknik të Ekspertëve, qeveria miratoi masat e reja kufizuese të lëvizjes dhe aktiviteteve të lokaleve dhe restoranteve, të cilat duhet të mbyllen nga ora 22:00 deri në 06:00.

Prej së hënës situata e pandemisë në Shqipëri është përmbysur pasi tashmë ka më shumë raste aktive se sa raste të shëruara nga COVID-19.

Tirana (6,229 raste), Durrësi (1,094 raste) dhe Fieri (971 raste) janë qarqet më problematike për sa i përket pandemisë, ndërsa ditët e fundit ka pasur edhe raportime me nga mbi 10 viktima ditore ndër pacientët me COVID-19.

Autoritetet shëndetësore janë të mendimit se me masat e reja, të cilat do të jenë në fuqi tre javë, prirja e pandemisë të mund të tkurret.