Kryeministri Rama emëron “kritikun” e tij si zv.ministër të Financave

Kryeministri i Shqipërisë, Edi Rama ka emëruar në postin e zëvendësministrit të Financave dhe Ekonomisë Besart Kadinë. Lajmin për emërimin në këtë post e konfirmoi vetë Kadia për Euronews Albania.

Deri në vitin 2019 Besart Kadia ka mbajtur postin e sekretarit për sipërmarrjen në PD.

Në Nëntor të 2019 z. Kadia është shkarkuar nga kryetari i PD Lulzim Basha  për shkak se ishte nismëtar i krijimit të lëvizjes politike “Alternativa”, e financuar siç shkruhet në shkresën e PD nga burime të dyshimta financiare të klientëve preferencial të qeverisë.

Që nga ajo datë Kadia nuk ka asnjë funksion në Partinë Demokratike dhe nuk mund të ketë as në të ardhmen. Atij i është hequr e drejta për të zgjedhur dhe për t’u zgjedhur në strukturat e Partisë Demokratike.

Ekonomisti Besart Kadia ka qenë një zë mjaft kritik ndaj politikave ekonomike të qeverisë Rama, por një ditë më parë atij iu besua posti kyç në Ministrinë e Financave dhe të Ekonomisë. 

Vendimi i Këshillit të Ministrave:

Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave

V E N D O S I:

Z. Besart Kadia emërohet zëvendësministër i Financave dhe Ekonomisë. Ky vendim hyn në fuqi menjëherë.