Përballja me Hagën, seanca e radhës e ish-luftëtarëve të UÇK-së më 18 nëntor

Pas Jakup Krasniqit, Hashim Thaçit e Kadri Veselit, edhe Rexhep Selimi është deklaruar i pafajshëm ndaj akuzave të Dhomave të Specializuara të Gjykatës Speciale në Hagë. 

Selimi tha se kushdo që ka dyshime, do të bindet që UÇK-ja nuk ka pasur lidhje me krime, por ka luftuar kundër pushtuesit serb për liri. 

Të gjithë themeluesit e UÇK-së kanë mbyllur kështu seancat e para gjyqësore ndaj tyre, ndërsa seanca e radhës do të mbahet më 18 nëntor.

Për tre ditë me radhë një e nga një ata dolën para drejtësisë në Hagë me akuzën për krime lufte dhe krime kundër njerëzimit.

Të qetë por të vendosur , katër ish-luftëtarët e Ushtrisë Çlirimtare të Kosovës i hodhën poshtë të gjitha akuzat e ngritura ndaj tyre.

Jakup Krasniqi dhe Rexhep Selimi përcollën mesazhe të forta në sallën e gjyqit.

Krasniqi, zëdhënësi i UÇK i konsideruar si njeriu i letrave, nuk i mbajti emocionet herë pas here, por as nuk e fshehu krenarinë e të qenit pjesë e një lufte për të drejtën për lirinë e Kosovës.

Ndërkaq, Rexhep Selimi njeriu që bëri paraqitjen e parë të UÇK-së i tha Gjykatës dhe mbarë botës se ai ishte çlirimtar ndërsa iu kujtoi se përkrah tyre për çlirimin e Kosovës luftoi dhe Aleanca e Atlantikut të Veriut.

Dhomat e Specializuara kanë njoftuar se konferenca për ecurinë e çështjes ndaj Hashim Thaçit, Kadri Veselit, Jakup Krasniqit e Rexhep Selimit do të mbahet në 18 nëntor në orën 11:00 në Hagë.

Lexoni gjithashtu: 

Aktakuza për krime lufte, Thaçi dhe Krasniqi sot para Gjykatës së Hagës

‘Jam një çlirimtar, luftën e kam nisur me Adem Jasharin’, Rexhep Selimi në Hagë: Ndihen i pafajshëm, aktakuza shumë e rëndë

Kadri Veseli përballet me Gjykatën e Hagës: Deklarohem me bindje se jam i pafajshëm

I indinjuar dhe emocional, Krasniqi në Hagë mohon akuzat: Kurrë nuk e kam drejtuar gishtin nga civilët