Femrat më të keqpaguara se meshkujt, eksperti Erion Muça: Arsyet se pse kjo ndodh

Shqipëria ka regjistruar një hendek të thellë gjinor edhe në aspektin e pagave. Sipas INSTAT, për të njëjtën punë në ndërmarrjet e mesme dhe të mëdha meshkujt kanë vijuar të paguhen më shumë se femrat, ndërsa paga mesatare arriti në 50,700 lekë.

Në thellimin e kësaj diference thonë ekspertët ndikojnë shumë faktorë, mes tyre edhe diskriminimi i femrave. Eksperti i punësimit dhe pedagogu i njohur, Erion Muça, foli në Euronews Albania mbi këto pabarazi, ku dhe renditi arsyet kryesore se pse femrat janë më të keqpaguara se burrat në tregun e punës.

“Unë gjykoj se janë gjashtë arsye se pse ndodh kjo pabarazia në paga midis fermave dhe meshkujve. Arsyeja e parë lidhet mes profesioneve që zgjedhin për të studiuar gratë dhe burrat. Që në fillim gratë përgjithësisht zgjedhin profesione me pozicione pune në treg, që relativisht kanë paga më të ulëta. Për shembull zgjedhin mësuesinë, e cila ka pagë mesatare dhe meshkujt zgjedhin inxhinieritë që kanë pagë më të lartë. Kjo është arsyeja pse ndodh, dhe nuk është vetëm për Shqipërinë. Arsyeja e dytë, ka një dallimin gjinor, që lidhet me sektorët dhje profesionet. Meshkujt punojnë në sektorë në prodhim që kanë ngarkesë dhe paga e tyre është më e lartë. Arsyeja e tretë unë do të them se lidhet me faktin se gratë janë të prirura për të punuar me kohë të pjesshme. Kjo sjellë diferencë në paga.

Arsyeja e katërt, ka një prezencë të diskriminimit dhe paragjykimit, dhe kjo fillon që në fazat e para të kërkimit të një pune. Femrat paragjykohen që në fazat e para të punës. Arsyeja e pestë se pse ka një pabarazi të tillë në vlerësim midis femrave dhe meshkujve është fakti se një pjesë e mirë e femrave, sipas statistikave, dy muaj në vit nga mbingarkesa tek femrat është punë e papaguar”, tha ai.

Ai theksoi se hendeku i krijuar në këtë pjesë mund të eliminohet vetëm përmes emancipimit social dhe pavarësisë, që duhet të kenë femrat.

“Sa më e emancipuara dhe sa më të pavarura të jenë femrat dhe sa më të larta t’i kenë pretendimet aq më i ulët do të jetë hendeku i pagave”, tha ai.

Lexoni gjithashtu:

Hendeku i pagave në Shqipëri, burrat paguhen më shumë se gratë për të njëjtën punë