Raporti i BERZH: Rritet korrupsioni, PPP-të rrezikojnë borxhin

Qeverisja në vend vlerësohet me notë negative në vitin 2020, në raportin e fundit të tranzicionit të publikuar nga BERZH (Banka Europiane për Rindërtim dhe Zhvillim).

Raporti vlerëson se korrupsioni mbetet në nivele të larta, ndërsa qeverisë i tërhiqet vëmendja të rishikojë ligjin e koncesioneve.

Sipas këtij raporti, i cili këtë vit është përqendruar në rëndësinë që ka roli i shtetit për shkak të krizës së Covid-19, konstatohet se treguesit e mirëqeverisjes në vend janë përkeqësuar.

Po ashtu dhe efiçenca e gjyqësorit dhe perceptimi i korrupsionit e stabilitetit politik janë vlerësuar me notë negative.

Në këtë raport janë 6 tregues që maten në indeksin e vlerësimit të cilësive të tranzicionit, konkurrueshmëria, mirëqeverisja, ekonomia e gjelbër, gjithëpërfshirja, rezistenca dhe integrimi. 

Në pikëzimin nga 1 deri në 10, mirëqeverisje e Shqipërisë ra nga 5.16 në vitin 2019, në 4.5 në 2020, duke qenë vendi i dytë me qeverisjen më të keqe në Europen Juglindore, pas Bosnjë-Hercegovinës.

BERZH vlerëson se borxhi publik mbetet i lartë, dhe gjatë vitit të kaluar ka mbërritur në rreth 68.0 përqind të PBB-së, pa marrë në konsideratë kostot e koncesioneve PPP.

Në këto kushte, raporti këshillon qeverinë të rishikojë kuadrin ligjor  dhe të forcojë institucionet dhe sundimin e ligjit. Përveç kësaj, burimet e energjisë duhet të diversifikohen duke zvogëluar varësinë e vendit nga gjenerimi i hidrocentraleve.

Lexoni gjithashtu: 

Të rinjtë shqiptarë skeptikë ndaj politikës, Rigels Xhemollari: Nuk besojnë as tek bashkëmoshatarët e tyre