Vala e dytë e COVID-19, mjeku Tolaj: Autoritetet nuk kanë qenë serioze në marrjen e masave

Mjeku infektolog Ilir Tolaj në një intervistë për Euronews Albnia, tha se kjo valë e dytë e pandemisë po reflektohet në një numër jashtëzakonisht të madh të infeksioneve të reja.

“Koha më e qetë e pandemisë midis dy valëve, as nga Shqipëria dhe as nga Kosova nuk është shfrytëzuar për të krijuar kapacitete të reja ose për të shtuar kapacitetet ekzistuese,” – tha mjeku i cili sqaroi se për këto arsye merren dhe masat kufizuese.

Sipas tij autoritetet përkatëse nuk kanë qenë serioze në pritjen e valës së dytë dhe kanë konsideruar se gjithçka mori fund me valën e parë duke mos i dhënë vëmendjen e duhur pandemisë dhe menaxhimit të saj.

Në këndvështrimin e mjekut Tolaj për parandalimin e situatës, ose do të duhet që masat kufizuese të jenë shumë më të forta ose kapacitetet spitalore duhen shtuar.

“Sistemi shëndetësor si në Shqipëri ashtu dhe në Kosovë ka ende resurse dhe kapacitete të pashfrytëzuara deri tani të cilat mund të shfrytëzohen në një situatë më kritike,” – tha Tolaj.

“Problemi kryesor është që çdo gjë politizohet,” – shtoi ai.

Pas një muaji nëse vazhdohet me këto masa mjeku pohoi se numri ka mundësi të bjerë por sidoqoftë pandemia nuk do të mund të largohet. Sapo masat të lirohen virusi do të jetë sërish në një fluks numri në rritje.

Ilir Tolaj sqaroi se për vendet në zhvillim si Shqipëria dhe Kosova këto masa nuk janë aspak pozitive.

Lexoni gjithashtu: 

Lëvizje me kufizim, si sigurohet autorizimi nga ora 22:00-06:00 për të shmangur gjobën

Rritet numri i të shtruarve me Covid-19 në spitalin e Pejës në Kosovë

777 pacientë kanë humbur betejën me COVID-19 në Kosovë, mbi 8 mijë të tjerë të infektuar