Plator Nesturi: Partitë e reja do të ndikojnë në rezultatin e zgjedhjeve të 25 prillit

Partitë e reja do të kenë ndikim në rezultatin e zgjedhjeve të 25 prillit, kështu mendon analisti Plator Nesturi, i cili gjatë një debati në emisionin Ilva Now në Euronews Albania, përballë analistit Vehab Kola dhe gazetarit Aleksandër Çipës, theksoi se dalja e partive të reja nga opozita fragmentarizojnë edhe votën që do të mundë të marrë Partia Demokratike.

“Partitë e reja, s’e di se çfarë vendi do të zënë në spektrin politik, por që do të kenë ndikim në rezultatet e zgjedhjeve të 25 prillit, do të kenë, kryesisht te humbësi, e them këtë gjë sepse në vetvete këto parti janë krijuar nga spektri i djathtë, janë dalë nga Partia Demokratike,” – u shpreh Nesturi duke theksuar se përgjithësisht nuk ndodh që përpara zgjedhjeve të krijohen parti të reja nga opozita.

Nesturi e konsideroi krijimin e partive të reja si rrjedhojë e luftës së brendshme brenda Partisë Demokratike ku sipas tij kryetarit Lulzim Basha tashmë i duhet ta zhvendosë luftën politike “edhe anash” sepse me partitë e reja oponenca bëhet edhe mes tyre.

“Këto parti në fund të fundit janë pjesë e opozitës dhe e kërkojnë votën e tyre në elektoratin e djathtë, dhe në këtë aspekt kemi jo vetëm ndarje të votave të elektoratit të djathtë, por edhe betejë që patjetër do të ndikojë në rezultatin e zgjedhjeve parlamentare të 25 prillit,” – u shpreh Nesturi.

Sipas Nesturit fragmentarizimi i së djathtës mund të ndikojë edhe te elektorati gri. Ai këmbënguli se fragmentarizimi është fenomen i pamohueshëm.

Për sa i përket koalicioneve, Nesturi tha se është e paqartë se si do të pozicionohen partitë e reja, ndërsa dy partitë e mëdha opozitare, sipas tij, do të organizohen në dy koalicione më vete.

“Çdo lloj vote e marrë, sidomos në qarqe të veçanta mund të bëjë dallime në ndarjen e mandateve, është si atëherë kur Partia Demokratike bëri koalicion me Partinë Komuniste në Bashkinë Tiranë kur ato vota që mori Hysni Milloshi me partinë e tij ndikoi në rezultatin e atyre zgjedhjeve,” – u shpreh Nesturi.

Ndiqni intervistën e plotë:

Lexoni gjithashtu:

Të rinjtë e 25 prillit, Vehap Kola: Janë parti pa kauza që kanë si qëllim të ndihmojnë pushtetin