Dy humbje të mëdha në fushën e mjekësisë dhe mësimdhënies në betejë me COVID-19

Është ndarë nga jeta në spitalin Infektiv doktor Ilirjan Draçi i cili ka shërbyer për vite me radhë si mjek Gastro–Hepatolog dhe si drejtues në poliklinikën numër 1 të Tiranës.

Një një postim të disa ditëve me parë, doktor Draçi ndau një foto ku shfaqej me maskën e oksigjenit nga spitali dhe u bënte apel qytetarëve për kujdes duke u thënë se gabimi më i vogël mund t’u kushtojë jetën.

Ditën e sotme e ka humbur betejën me COVID edhe pedagogia e Fakultetit të Ekonomisë, Irena Bogdani, një nga emrat më të vlerësuar në ambientet akademike të Universitetit të Tiranës. Ajo i dedikoi jetën mësimdhënies ku kontribuoi për 3 dekada. Euronews Albania i shpreh ngushëllime familjareve.

Gjatë javëve të fundit në vendin tonë ka pasur një rritje të ndjeshme të numri të personave të prekur por edhe të atyre që kanë humbur jetën.

Vetëm një ditë më parë pati mbi 600 raste pozitive, ndërkohë që në total numri i rasteve aktive ka shkuar në mbi 14 mijë persona.

Që prej fillimit të pandemisë së COVID-19 dhe deri tani në Shqipëri ka pasur 631 jetë të humbura.

Lexoni gjithashtu:

Rritja e infektimeve, Komiteti Teknik i Ekspertëve vendos tre masa të reja kufizuese