Nënkryetari i PDK-së: Haradinajn për president s’po e mbështet as koalicioni

Nënkryetari i Partisë Demokratike të Kosovës, Memli Krasniqi ka folur së fundmi për kandidaturën e Ramush Haradinajt për president dhe votat hua që ai ia ka kërkuar PDK-së.

Sipas KosovaPress Krasniqi ka deklaruar për Rubikon se është e pakuptimtë që Haradinaj del e kërkon vota në opozitë kur nuk e mbështet asnjë partner i koalicionit.

“Ky koncepti i Haradinajt për vota hua për mua është i pakuptimtë. Sepse sikur të vepronim ne me vota hua duhet t’i themi zotit Haradinaj a po na kthen ato votat e vitit 2017 kur të bëmë kryeministër”, tha ai.

“Unë nuk e di përveç që e ka nominuar partia e tij që e mbështetë dikush tjetër për kandidat.

Po kandidat i kujt është? Është kandidat i AAK-së apo është kandidat i koalicionit. Qysh del me lypë vota në komshinj kur nuk i ke në shtëpi tënde njëherë.

Unë i kam dëgjuar LDK-në dhe partitë tjera të koalicionit dhe askush nuk e ka mbështetë.

Dhe qysh mundesh të kërkosh vota prej opozitës kur ende se ke asnjë votë të koalicionit”, u shpreh ai më tej.

Krasniqi theksoi se asnjëherë deri tani në Kryesinë e PDK-së nuk është diskutuar çështja e zgjedhjes së presidentit.

Ai e ka cilësuar si jo-etike mënyrën se si Haradinaj e ka nominuar veten për president që nga momenti kur Prokuroria e Hagës ka publikuar njoftimin për aktakuza.

Lexoni gjithashtu:

Në kërkim të një presidenti, fraksione në politikën kosovare

Zgjedhja e presidentit, politologu: Për këtë post po pretendon Haradinaj, nëse s’ka kompromis do shkojmë në zgjedhje