Kuvendi i bindet urdhrit të Komitetit Teknik të Ekspertëve, nesër nuk ka seancë plenare

Masat e reja të shpallura nga Komiteti Teknik i Ekspertëve për situatën me pandeminë kanë detyruar Kuvendin që të anulojë seancën e radhës. Kryeparlamentari, Gramoz Ruçi ka njofton se e enjtja do të jetë ditë pushimi për deputetët, pasi mbledhja në Kuvend bie ndesh me urdhrin e Ekspertëve të Shëndetësisë.

Sa i përket vazhdimësisë, Ruçi i është drejtuar me kërkesë Komitetit Teknik dhe Ministres së Shëndetësisë.

“Kryetari i Kuvendit vendosi që të mos zhvillohet seanca plenare e Kuvendit të Shqipërisë, e planifikuar për ditën e enjte, datë 19 nëntor 2020. Në respekt të zbatimit të këtyre masave, Kryetari i Kuvendit, z. Gramoz Ruçi, i është drejtuar Komitetit Teknik të Ekspertëve dhe Ministres së Shëndetësisë dhe Mbrojtjes Shoqërore, znj. Ogerta Manastirliu,  për të bërë një interpretim lidhur me vazhdimin e seancave plenare të Kuvendit”, thuhet një njoftimin e shpërndarë për mediat.

Komitetit Teknik vendosi të ndalojë grumbullimet me mbi 10 persona, tubimet partiake dhe festat e ceremonitë familjare.

Kreu i Kuvendit, Gramoz Ruçi thotë se puna në komisionet përkatëse do të vijojë përmes platformave online. 

“Puna në komisionet parlamentare vazhdon online”, sqarohet në njoftim.