Minatorët e Trepçës në grevë, kërkojnë pagat e prapambetura

Mbi 200 minatorë të minierës së Trepçës në Kosovë janë futur në greve urie për shkak të mosmarrjes së pagave nga ana e shtetit. Ata kanë paralajmëruar se do vijojnë grevën deri sa të marrin pagat e muajit të kaluar.

Pas këtij vendimi, Ministria e Ekonomisë dhe Ambientit ka vendosur të shpërndajë ndihmën financiare prej 1.1 milionë eurosh për minatorët e Trepçës. Edhe pas këtij vendimi, minatorët janë të vendosur të vijojnë grevën, pasi ndihen të gënjyer nga qeveria.

Kreu i Sindikatës së Punëtorëve të Trepçës, Gani Osmani, tha për Euronews Albania se punëtorët ende nuk kanë marrë pagat, pavarësisht se qeveria e Kosovës ka premtuar zgjidhje. Ai shtoi se minatorët e Trepçës do vijojnë grevën deri në momentin kur pagat e tyre të hidhen në llogaritë bankare.

“Qeveria e ka ofruar 1.1 milionë euro të premten e kaluar, nesër bëhet një  javë. Kanë kaluar një javë dhe nuk janë hedhur pagat. Deri sa të nxirren pagat ne nuk punojmë”, tha ai.